Co-accused ni De Lima, natimbog ng NBI
Sa illegal drug trade sa bilibid
MANILA, Philippines — Nalambat na ng mga tauhan ng National Bureau of Investigation (NBI) ang sinasabing ‘pamangkin’ at umano’y ‘bagman’ ni Sen. Leila De Lima sa illegal drug trade sa Bilibid matapos matunton sa kaniyang pinagtataguan sa Balibago, Angeles City, Pampanga, kahapon ng umaga.
Iniharap kahapon sa pulong-balitaan ng mga opisyal ng National Bureau of Investigation (NBI) si Jose Adrian Tiamson Dera, alyas Jad Dera, sa kaniyang tahanan sa Diamond Subdivision, Balibago, Angeles City ng pinagsanib na pwersa ng NBI-Special Task Force, NBI-Death Investigation Division at NBI-Anti-Human Trafficking Division.
Ayon kay NBI Assistant Director for Intelligence Eric Distor, isang buwan ang ginawang pagmamanman ng NBI-STF sa mga lugar na posibleng puntahan ni Dera hanggang sa matunton siya sa Diamond Subd.
Si Dera ay may nakabinbing kaso sa Muntinlupa Regional Trial Court Branch 205 na nag-isyu ng warrant of arrest noong Hulyo 19, 2017 laban sa kaniya at kay De Lima sa paglabag sa Section 5, Section 3 , Section 26, Section 28 ng Republic Act 0165 o Comprehensive Dangerous Drugs Act of 2002.
Kaugnay ito sa illegal drug trading na sangkot ang mismong Bureau of Corrections (BuCor) at kasamang mga akusado sina Ronnie Dayan, ang dating bodyguard-lover ni De Lima; ang dating aide na si Joenel Sanchez; at ang dating director general ng BuCor na si Franklin Bucayu, dati pang aide na si Wilfredo Elli at ang convicted drug lord na si Jaybee Sebastian.
Mananatili sa NBI detention facility si Dera hangga’t hindi pa nakukuha ang commitment order mula sa korteng nabanggit.
Ayon sa NBI, si Dera lang ang hindi naaresto at hindi pa nabasahan ng sakdal sa nasabing kaso.
- Latest
