Isko dadagdagan ng pulis
MANILA, Philippines — Tiniyak ni National Capital Regional Police Office (NCRPO) chief Brig. Gen. Guillermo Eleazar na handa siyang magdagdag ng puwersa ng mga pulis sa lungsod ng Maynila bilang suporta sa kampanya ni Mayor Isko Moreno na malinis ang lugar mula sa vendors at iba pang uri ng obstruction.
Ang paniniyak ay ginawa ni Eleazar sa kanyang courtesy call kay Moreno kasabay ng pahayag na lubhang natuwa at nagulat ang marami nang lumuwag at makita ang mga kalsada na natakpan ng vendors at parking sa mahabang panahon.
Sinabi ni Eleazar na hindi biro ang pagbabago na ginawa ni Moreno sa loob ng 22 araw kaya handa naman siyang magdagdag ng mga pulis na magmomonitor din sa mga lugar na na-operate na upang masiguro na hindi babalik ang mga illegal vendor sa kalsada.
Ayon naman kay Moreno, ginawa lamang niya ang dapat na tungkulin at responsibilidad ng isang alkalde. Aniya, kung nais ng Manilenyo na maibalik ang ganda ng lungsod, dapat lamang na simulan ito sa paglilinis ng barangay at kalsada.
Ikinatuwa rin ni Moreno ang bansag na ‘Iskontagious’ dahil na rin sa tinutularan ng kalapit na lungsod ang kanyang paglilinis sa Maynila.
- Latest