5 barangay chairman ‘namumuro’ kay Isko
Dedma sa obstruction
MANILA, Philippines — Pinangalanan ni incoming Manila Mayor Isko Moreno Domagoso ang limang barangay chairman na umano’y patuloy na kumukunsinti sa illegal obstruction sa kani-kanilang lugar.
Sa ginanap na Kapihan sa Manila Bay, pinaalalahanan ni Domagoso sina Brgy. Chairman Odec Bautista, Brgy. Chairman Ipon, Brgy. Chairman Macaso at Brgy. Chairman Diana pawang District 3 at Brgy. Chairman Lagamayo na ayusin at linisin ang kanilang lugar.
Sinabi ni Domagoso na huwag na sanang hintayin ng mga barangay chairman ang kanyang gagawin sa sandaling magsimula na ang kanyang termino.
Ayon kay Domagoso, dapat nang itigil ng mga barangay officials ang ‘patong’ upang hindi matanggal ang mga obstruction at sagabal sa daanan.
Maging ang mga eskinita ay papasukin ng mga tauhan ng Manila City Hall upang mabigyan lamang ng sapat na daanan ang mga publiko.
Aniya, ia-acetylene niya ang mga nakahambalang na mga trailer trucks at container van upang matanggal sa lugar.
Ang mga may-ari ng trailer trucks at container van na nakaparada sa iba’t ibang lugar sa Maynila ay nagbabayad ng P1,000 kada araw sa mga barangay officials.
Binigyan diin ni Domagoso na may pananagutan ang barangay officials kung wala itong ginagawang kaayusan sa kanyang nasasakupan.
- Latest
