Nagpautang na, pinatay pa
MANILA, Philippines — Bala ang ibina-yad sa isang lalaking naningil ng kanyang pautang na naging sanhi ng kanyang kamatayan sa Taguig City, kamakalawa ng gabi.
Biniberepika nga-yon ng Taguig City Police ang pagkakakilanlan sa biktima na inisyal na nakilala sa pangalang “Cholo”, nasa pagitan ng edad 30-35 taong gulang, may taas na 5’9”, nakasuot ng itim na t-shirt, berdeng jacket, at asul na shorts.
Bigo naman na makilala ang salarin ma-karaang mabilis na tumakas matapos ang pamamaril.
Sa ulat ng Taguig City Police, naganap ang insidente dakong alas-6 ng gabi sa kahabaan ng Capistrano Extension, Brgy. Hagonoy, ng naturang lungsod.
Sa salaysay ng saksing Grab driver, sumakay sa kanya ang biktima sa may Pasig City at nagpahatid sa Taguig. Dito niya nakakuwentuhan ang biktima na nagpakilalang “Cholo” na nagsabing may hinahanap siyang tao para singilin ng utang.
Pagdating sa Ca-pistrano Extension, bumaba ang kanyang pasahero pero sinabihan siya na maghintay. Makalipas ang ilang sandali, nakarinig ang Grab driver ng sunud-sunod na putok ng baril.
Nang tumahimik at magkalakas ng loob, tinunton niya ang pinagmulan ng mga putok at tumambad sa kanya ang duguan at wala nang buhay na biktima.
Rumesponde naman ang mga tauhan ng pulisya ngunit hindi na nagawang mahabol ang salarin.
- Latest
