Crane bucket bumagsak: 6 sugatan
MANILA, Philippines — Anim na katao ang sugatan nang aksidenteng bumagsak ang isang crane bucket at tumapon ang laman nitong semento sa Pasig City, kahapon ng umaga.
Ang mga biktima ay nakilalang sina Melanie Felismino, Gaily Palma, at Edgar Galban at tatlo pang hindi na tinukoy ang pangalan na agad din umuwi sa kanilang tahanan.
Batay sa ulat ng Pasig City Police, dakong alas-8:45 ng umaga nang maganap ang insidente sa isang ginagawang tower sa Garnett Road sa Ortigas Center, Brgy. San Antonio, Pasig City.
Magbubuhos sana ng hinalong semento ang isang monolit crane nang aksidenteng maputol ang kable nito.
Dahil dito, tumapon ang laman nitong semento at tumama sa mga biktima, na nagresulta sa pagkasugat ng mga ito.
Samantala, may limang iba’t ibang uri rin ng pribadong sasakyan ang nasira dahil sa pangyayari.
Iniimbestigahan pa ng mga awtoridad ang insidente upang matukoy kung sino ang dapat na managot dito.
- Latest
