Drug ops sa Navotas: 4 nadakma

MANILA, Philippines — Apat  na drug suspek ang nadakip ng mga tauhan ng Navotas City Police sa isang buy-bust operation na nagresulta sa pagkakakumpiska sa tinatayang P228,000 halaga ng shabu, kahapon ng madaling araw sa naturang lungsod.

Kinilala ang mga naarestong suspek na si Michael Bonzon, alyas Barok, 47; Marissa De Guzman, 39;John Paolo Cubos, 21 at Jojo Delos Reyes, 24, pawang residente ng Brgy. North Bay Boulevard North ng naturang lungsod.

Sa ulat ng pulisya, alas-2:30 ng madaling araw nang magkasa ng operasyon ang Station Drug Enforcement Unit (SDEU) kasama ang PDEA CAMANAVA kontra sa mga suspek sa Brgy. NBBN, ng naturang lungsod.

Nagawang makapagtransaksyon ng poseur buyer sa mga suspek at nakabili ng isang plastic sachet ng shabu kapalit ng halagang P300 marked money. Nang magbigay ng senyales ang poseur-buyer, agad na lumusob ang back-up na mga operatiba at sinunggaban ang mga suspek.

Nakumpiska sa mga suspek ang 14 plastic sachets na naglalaman ng nasa 60 gramo ng hinihinalang shabu na nasa P228,000 ang halaga.

Patuloy ang follow-up investigation at operation ng pulisya upang matukoy kung saan kinukuha ng mga suspek ang isinusuplay sa kanilang shabu.