Sanggol patay sa bundol ng jeep

MANILA, Philippines — Patay ang isang taong gulang na sanggol habang sugatan naman ang ina nito matapos mabundol ng isang pampasaherong jeep habang naglalakad sa gilid ng kalsada sa Navotas City, kahapon ng umaga.

Nakilala ang nasawi na si Kaehl Ejija Mariano habang sugatan naman ang kanyang ina na si Angelica Ejija, 22-anyos, kapwa nakatira sa No. 098 Pescado St., Brgy. Bangkulasi, Navotas City.

Arestado at nahaharap naman sa kasong Homice at Physical Injury through Reckless Imprudence ang driver ng jeep na si Reymond Villanueva, 45, residente ng Inocensio St., Brgy. 93 Capulong, Tondo, Maynila.

Sa ulat ng Navotas City Police, naganap ang insidente dakong alas-6:30 ng umaga sa may Road 10 Pescador, Brgy. Bangkulasi, ng naturang lungsod.

Naglalakad si Angelica karga ang kanyang anak na sanggol sa bangketa ng Road 10 patungo ng kanilang bahay nang biglang masagi ng pampasaherong jeep (TVR 259) na minamaneho ni Villanueva dahilan ng kanilang pagbagsak sa kalsada.

Agad na isinugod sa Navotas City Hospital ang mag-ina ngunit hindi na umabot nang buhay ang sanggol na si Kaehl habang nagtamo ng pinsala sa katawan ang kanyang ina.