Pasahero arestado sa granada sa NAIA
MANILA, Philippines — Arestado ang isang pasahero sa Ninoy Aquino International Airport (NAIA) Terminal 2 matapos makumpiskahan ng granada sa backpack nito noong Biyernes.
Nasa kustodya na ngayon ng Philippine National Police Aviation Security Group (PNP-ASG) ang pasaherong si Deogracias Polmano, nasa hustong gulang.
Lumalabas sa report ng pamunuan ng NAIA, dakong alas-5:00 ng hapon nang pumasok sa NAIA Terminal 2 si Polmano kung saan sa initial screening ay nakita na ng mga airport personnel ang isang MK2 fragmentation grenade sa loob ng kanyang backpack.
Dito ay agad na ipinatawag ang K-9 Unit ng NAIA upang ma-inspeksyon ang bagahe nito at dito nga nakumpirma na granada ang nasa loob ng backpack.
Nabigo naman si Polmano na magpakita ng kaukulang dokumento hinggil sa dala nitong granada sa mga otoridad kung kaya’t agad na inaresto at sinampahan ng kasong paglabag RA 9156 o Illegal Possession of Explosives.
- Latest
