Ginang itinumba ng tandem
MANILA, Philippines — Utas ang isang ginang na negosyante nang pagbabarilin ng dalawang hindi kilalang salarin habang sugatan naman ang dalawang ginang na kausap nito matapos tamaan ng ligaw na bala, kamakalawa ng gabi sa Taguig City.
Nasawi noon din ang biktimang si Rowena Calderon, ng Brgy. New Lower Bicutan ng naturang lungsod.
Ginagamot naman sa Taguig-Pateros District Hospital sina Lucile Bugarin, 38, at Rosemarie Ormita, 43.
Ayon sa pulisya, naganap ang insidente alas-7:25 kamakalawa ng gabi sa A. Reyes St., Brgy. New Lower Bicutan.
Nabatid na ang mga biktima ay nag-uusap sa tindahan na pag-aari ni Calderon at walang kamalay-malay ang mga ito sa pagdating ng dalawang suspect.
Walang sabi-sabing pinagbabaril ng mga suspect si Calderon, na naging sanhi ng agaran nitong kamatayan habang tinamaan ng ligaw na bala ang dalawang kausap nito.
Pagkatapos ng pamamaril ay mabilis na tumakas ang mga suspect.
Sa ngayon ay iniimbestigahan pa ng pulisya ang motibo nang pamamaril.
- Latest
