Acierto, 7 pa ipinaaaresto ng korte
MANILA, Philippines — Ipinag-utos ng Manila court ang pag-aresto sa dating police official na si Eduardo Acierto at pitong iba kaugnay sa smuggling ng bilyong halaga ng shabu shipments noong nakaraang taon.
Ang arrest warrant ay inisyu ni Manila Regional Trial Court Branch 35 laban kay Acierto at mga co-acused sa kaso na isinampa ng DOJ.
Kabilang pa sa ipinaaaresto ay sina dating Customs Intelligence Officer Jimmy Guban at dating PDEA Deputy Director for Administration Ismael Fajardo; ang importers na sina Chan Yee Wah, alyas KC Chan at Zhou Quan, alyas Zhang Quan; consignees na sina Vedasto Cabral Baraquel Jr. at Maria Lagrimas Catipan at Emily Luquingan.
Sa mga nabanggit, bukod tanging si Guban na tumestigo kamakailan sa congressional investigation ang kasalukuyang nasa kustodya ng mga awtoridad.
Sa kanyang kautusan na ipinalabas noong nakaraang Abril 12, 2019, walang inirekomendang piyansa si Judge Ma. Bernardita Santos sa mga akusado dahil ang drug importation charges ay kabilang sa non-bailable na kaso sa ilalim ng batas.
- Latest