Media at artista nasa drug watchlist ng PDEA
MANILA, Philippines — Inihayag kahapon ni Philippine Drug Enforcement Agency (PDEA) Director General Aaron Aquino na ilang miyembro ng media at mga artista ang kabilang din sa 20,000 na indibidwal na nasa kanilang drug watchlist.
Gayunman, tumanggi si Aquino na pangalanan ang mga kagawad ng media at artista na nasa National Drug Information System (NDIS) ng kanilang tanggapan.
Ayon kay Aquino, ang pagkakaiba ng hawak ng Pangulong Rodrigo Duterte na 6,000 na sangkot sa droga ay validated na habang ang nasa 20,000 na NDIS ng PDEA ay kasalukuyan palang bina-validate.
Sinabi ni Aquino, nangangalap pa sila ng dagdag at solidong ebidensiya laban sa mga kagawad ng media at artista bago nila ito sampahan ng kaukulang demanda.
Aniya, may isang team sila sa PDEA na kinabibilangan ng NICA, AFP, PNP at DILG na ang trabaho ay magsagawa ng validation at re-validation sa mga napapabilang sa kanilang drug watchlist bago ito ibigay o ipadala sa tanggapan ni Pangulong Duterte.
“Napapabilang ang isang tao sa aming drug watch list kung may reklamo at impormasyon laban sa kanya, pero kailangan naming i-validate ito para mapatunayan na involve talaga sa pagtutulak o kaya’y protektor ng droga”, sabi ni Aquino.
Tiniyak ni Aquino na agad naman nilang inaalis sa listahan ng kanilang drug watch list ang isang tao kapag lumabas sa kanilang validation na paninira lamang ang reklamo at impormasyon na ipinarating sa PDEA.
- Latest