Tren ng MRT-3, nag-apoy at umusok

MANILA, Philippines — Takot na takot at nagmamadaling nagsibaba sa ng sinasakyan nilang tren ng Metro Rail Transit Line 3 (MRT-3) ang may 645 na pasahero makaraang mag-apoy at umusok ang ilalim nito, kamakalawa ng gabi sa Quezon City.

IpinaIiwanag  ng pamunuan ng MRT-3 na matapos ang pagsusuring isinagawa sa nasirang tren, natuklasan ng kanilang mga technicians, na ‘short circuit’ sa high voltage wire ng traction motor nito ang naging dahilan nang pag-apoy at pag-usok ng tren, na nagdulot ng tensyon sa kanilang mga pasahero.

“Yun traction motor ng ating tren, ‘yung kanyang contactor ay nagdikit. That cause the high voltage wire to trip,” ani Engr. Mike Capati, director for operations ng DOTR-MRT3. 

Aniya, na-detect naman kaagad ng driver ang problema ng tren kaya’t inihinto niya ito upang mapababa at matiyak ang kaligtasan ng mga pasahero.

Naganap ang insidente dakong ala-6:02 ng gabi sa intersection ng Araneta-Cubao at Santolan, sanhi upang pababain ang may 645 pasahero nito, na napilitang maglakad sa riles ng tren, patungong istasyon.

Ayon kay Capati, kung kakayanin ay nais sana nilang sa istasyon ihinto ang nasirang tren para hindi mahirapan ang kanilang mga pasahero, ngunit kung talagang mapanganib ay wala silang magagawa kundi ihinto ito sa gitna ng riles.

Nagtagal ng kalahating oras o ala-6:35 ng gabi nang maibalik ang traction ng tren at kaagad itong dinala sa pocket track sa Shaw Boulevard station at maibalik sa normal ang operasyon ng linya ng tren.