Briton nagtangkang magpuslit ng 2 TV sa supermarket, kalaboso
MANILA, Philippines — Sa selda ang bagsak ng isang British national matapos magtangkang ipuslit sa isang kilalang supermarket sa Makati City ang dalawang unit ng telebisyon nang hindi binayaran, kamakalawa ng gabi.
Himas-rehas na ngayon ang suspek na si Michael Byres, 32-anyos, at may address sa Bunks Makati, No. 6001 Kalayaan Ave. corner Makiling St., Brgy. Olympia, ng naturang lungsod.
Sa ulat ng Makati City Police, dakong alas-9:50 ng gabi nang arestuhin si Byres ng security guard ng supermarket sa may Brgy. Olympia habang bitbit ang dalawang set ng flat screen na telebisyon.
Ayon sa guwardiya, napansin niya ang dayuhan na padaan sa exit ng supermarket na kanyang sinita. Nang hanapan ng resibo ng dala niyang mga telebisyon ay wala itong maipakita.
Nangatwiran pa umano ang dayuhan na naiwanan lamang niya ang pera niya at handa namang bayaran ang mga items ngunit humingi na ng responde ang security ng supermarket at inaresto ang Briton.
Nakaditine ngayon sa Makati City Police detention center ang dayuhan na nahaharap sa kasong Theft (Shoplifting).
- Latest