Mag-asawang testigo sa kaso, itinumba
Sa harap ng anak
MANILA, Philippines — Pinagbabaril hanggang sa mapatay ng nag-iisang gunman ang mag-asawa sa harap ng kanilang 11-anyos na anak sa loob ng kanilang bahay sa Caloocan City, kamakalawa ng gabi.
Nakilala ang mga nasawi na sina Albine Nervar, tricycle driver, at misis niyang si Nemia, kapwa 40-taong gulang, at nakatira sa Dhalia Street, Brgy. 177 Camarin, ng naturang lungsod.
Agad na tumakas ang nag-iisang salarin na nakasuot ng berdeng long sleeves na damit, itim na pantalon, nakasumbrero at may bitbit na itim na sling bag.
Sa ulat ng Caloocan City Police, sinabi ng batang babae na anak ng mga biktima na naglalaro siya sa tapat ng kanilang bahay dakong alas-8:30 ng gabi nang dumating ang salarin at bumili pa ng sigarilyo sa kanilang tindahan.
Umalis ang salarin ngunit muling bumalik at nakiusap na sindihan ang kanyang sigarilyo. Nang binuksan ni Albine ang pinto ng kanilang bahay para sindihan ang sigarilyo, biglang pumasok sa loob ang salarin at sunud-sunod na pinaputukan ang mga biktima na nasaksihan ng kanilang anak.
Ayon sa mga kaanak ng mga biktima, wala silang kilalang kaaway ng mag-asawang Nervar at wala ring alam na posibleng dahilan para paslangin sila, maliban umano sa testigo ang mag-asawa sa naganap na pagpaslang sa kapatid ni Nemia noong nakaraang Nobyembre.
Patuloy pa ang isinasagawang imbestigasyon sa insidente.
- Latest
