4 ‘big time drug dealer’, huli sa P6.8-M shabu
MANILA, Philippines — Apat na sinasabing ‘big time drug dealer’ ang nadakip ng mga tauhan ng Quezon City Police District (QCPD) sa isinagawang buy bust operation sa Taguig City, kamakalawa ng hapon.
Kinilala ni QCPD Dir. P/Chief Supt. Joselito Esquivel Jr ang mga suspek na sina Abel Dagadas, 34; Larrylyn Azada, 29; Usay Uting, 49 at Jacqueline Dapitan, 52 na pawang residente ng Sampaloc St. Brgy. Central Signal Village, Taguig City.
Ang apat ay nadakip dakong alas-4:20 ng hapon sa isinagawang buy-bust operation ng mga tauhan ng anti-drug operatives ng QCPD Station 7 na pinamumunuan ni P/Supt .Giovanni Hycenth Caliao.
Ayon kay Caliao, ang apat ay ‹ikinanta› ng dalawang drug pusher na una nilang nadakip sa Brgy. Culiat Quezon City na nakuhanan nila ng P680-K na halaga ng droga.
Ikinanta ng mga ito ang ‹source› na kinukuhanan nila ng droga na si Dagadas kaya isinagawa ang follow -up operation sa Sampaloc St. Brgy. Central Signal Village, Taguig City na nagresulta ng pagkakadakip ng apat.
Nakuha sa mga suspek ang mahigit isang kilong ‹high grade shabu› na nagkakahalaga ng P6.8 milyon, P10,000 buy bust money, digital weighing scale at iba’t ibang uri ng drug paraphernalia.
Sa ngayon ay inihahanda na ang pagsasampa sa kasong drug pushing laban sa apat na ngayon ay nakakulong sa QCPD detention facility. (Lordeth Bonilla)
- Latest