Metro Manila subway, sisimulan na!- DOTr
MANILA, Philippines — Inihayag ng pamunuan ng Department of Transportation (DOTr) na sisimulan na ang P355.6 billion Metro Manila Subway Project.
Ayon kay DOTr Sec. Arthur Tugade, ang groundbreaking ceremony para sa nasabing proyekto ay isasagawa sa darating na Miyerkules, (Pebrero 27).
Ang proyekto ay kapapalooban ng 15 istasyon mula sa Quirino Highway hanggang sa Ninoy Aquino International Airport (NAIA) Terminal 3 sa Parañaque City.
Sinabi ni Tugade, magiging inisyal na ‹operational› bago matapos ang taong 2022 ay ang mga istasyon ng Quirino Highway, North Avenue Station at Tandang Sora Subway Station.
Anang kalihim, nasa 120,000 na pasahero ang kapasidad araw-araw ang maseserbisyuhan ng tatlong subway station.
Tinukoy pa ng kalihim, ang iba pang istasyon na kinabibilangan sa Mindanao Avenue, Quezon Avenue, East Avenue, Anonas, Katipunan, Ortigas North, Ortigas South, Kalayaan, Bonifacio Global City, Cayetano Boulevard, Food Terminal Inc. at Ninoy Aquino International Airport.
Una nang inaprubahan ng National Economic and Development Authority (NEDA) ang proyekto na may 25-kilometer.
Target ng DOTr na bago matapos ang termino ni Pangulong Rodrigo Duterte sa 2022 ay tapos at ‹fully operational› na ang subway project.
Maging ang rehabilitasyon ng PNR service ay sisimulan na rin ngayong taon at inaasahang matatapos sa 2022.
- Latest