Sekyu inatado ng saksak, patay
Ibinalik sa lungga ng kaaway
MANILA, Philippines — Natagpuang wala nang buhay ang isang 27-anyos na guwardiya na pinaniniwalaang pinatay upang matangayan ng kaniyang service firearm, cell phone at hand-held radio habang naka-duty sa isang establisyemento sa San Marcelino St., Ermita, Maynila, kahapon ng umaga.
Sa ulat ni PO2 Marlon Dee ng Manila Police District-Homicide Section, alas-6:45 ng umaga kahapon nang madiskubreng patay na si Nestor Chiao Y Servandil. 27, stay-in security guard sa major Home Space sa San Marcelino St., Ermita at residente ng Roma San Joaquin, Iloilo City.
Papalitan sana ng karelyebong si Dandreb Pascua ang biktima nang makitang duguang nakabulagta sa kaniyang sementadong ground floor ng gusaling binabantayan.
Hindi na rin nakita ni Pascua ang kalibre 9 mm na service firearm na dapat umanong i-turn over sa kaniya ng biktima at ang hand-held radio.
Napansin din na wala na ang cell phone ng biktima na hinihinalang tinangay rin ng salarin.
Nakita pa sa logbook na nakapag-rekord pa ang biktima kaya posibleng madaling araw na naganap ang pamamaslang.
Ayon pa kay Pascua, alas-7:07 nitong Sabado ng gabi nang iwanan niya ang duty sa biktima.
Agad na ipinaalam sa nakasasakop ng MPD-Station 5 ang insidente.
Sa pagsisiyasat ng Scene of the Crime Operatives (SOCO, nakitaan ng maraming tama ng saksak sa iba’t ibang bahagi ng katawan.
Samantala, posibleng silipin pa ang isang anggulo bukod sa robbery with homicide matapos lumutang ang kapatid ng biktima na may iba siyang hinala sa pagkamatay ng kapatid.
Sinabi ni Johnger Chiao na ang kaniyang kapatid ay dati nang may nakaaway sa nasabing gusali matapos sitahin sa pagnanakaw noong nakalipas na Oktubre.
Nang mangyari umano iyon ay ipinalipat na ng management sa isa pang establisyemento sa Quezon City.
“Hinugot lang siya dahil walang magbabantay nung building kagabi. Nagtataka kami kung bakit siya binalik doon, eh may nakaaway na nga siya dati doon,” ayon sa kapatid ng biktima.
Pansamantalang inilagak ang labi ng biktima sa Archangel Funeral Homes para sa safekeeping at awtopsy.
- Latest