Sunog sa Maynila: 3 patay
MANILA, Philippines — Tatlo katao ang iniulat na nasawi matapos na ma-trap at ma-suffocate sa loob ng kanilang nasusunog na bahay kahapon ng umaga sa Sampaloc, Maynila.
Nakilala ang mga biktima na sina Lynn Rose Valentine, 50; Sibjordan Valentine, 26 at Grenre Tropicales, 17 na pawang mga residente ng 658 Doña Maria St. Sampaloc, Maynila.
Sa panayam kay F/Sr. Insp Reden Alumno, ng Bureau of Fire Protection (BFP), nagsimula ang sunog dakong alas-6:17 ng umaga at mabilis na kumalat sa buong bahay. Agad din naman itong naideklarang fire-out dakong alas-6:47 ng umaga.
Lumilitaw sa inisyal na imbestigasyon ng BFP na faulty electrical wiring ang dahilan ng sunog na nagmula sa kisame ng ikalawang palapag na bahay.
Ayon sa survivor na si Roselyn Salcedo, anak ni Lyn Rose, nasa unang palapag siya ng bahay nang kumalat ang usok. Bagama’t masakit ang kanyang mata pinilit niyang makalabas ng bahay. Nagtamo ito ng mga pasa sa braso at kamay.
Hinala ng awtoridad, nahirapan na makababa at makalabas ng bahay ang mga biktima na nasa ikalawang palapag dahil sa maraming nakaharang sa mga dadaanan.
Gayunman, patuloy ang isinasagawang imbestigasyon ng BFP.
- Latest