AWOL na pulis, itinumba sa harap ng bahay
MANILA, Philippines — Todas ang isang Absent Without Official Leave (AWOL) na miyembro ng Philippine National Police (PNP) matapos na pagbabarilin ng riding in tandem sa tapat ng kanyang bahay sa Quezon City, kamakalawa ng gabi.
Ang biktima ay nakilalang si PO3 Glen Bognot, 47, ng Block 14, Lot 15 Bistek VIII St., Brgy. Kaligayahan, Quezon City.
Nabatid na ang huling assignment bilang pulis ng biktima ay sa Anti-Carnapping Unit ng Quezon City Police District (QCPD) hanggang mag-AWOL sa trabaho.
Sa imbestigasyon na isinagawa ni PO1 Lheenard Ray Memoracion, nabatid na ang insidente ay naganap dakong alas-8:14 ng gabi sa harap ng bahay ng biktima.
Ayon sa report, naninigarilyo ang biktima nang pumarada sa kanyang harapan ang isang motorsiklo na sakay ang dalawang hindi pa nakikilalang suspek at agad itong pagbabarilin.
Nang matiyak na patay na ang biktima ay mabilis na tumakas ang dalawa na hindi namukhaan dahil kapwa nakasuot ng helmet at itim na jackjet.
Nagtamo ng tama ng bala sa ulo at katawan ang biktima na siyang dahilan ng kanyang kamatayan.
Sa ngayon ay nagsasagawa pa ng masusing imbestigasyon ang pulisya para mabatid ang motibo ng krimen at madakip ang dalawang salarin.
- Latest