4 ‘Ativan’, timbog
MANILA, Philippines — Timbog ng mga tauhan ng Manila Police District-General Assignment and Investigation Section (MPD—GAIS) ang apat na miyembro ng ‘Ativan gang’ sa Sampaloc, Maynila.
Kasalukuyang nakapiit sa MPD-GAIS ang mga suspek na sina James Soriano,54; Michelle Wenceslao, 34; Analyn Castro, 39; at Elma Matas, 39.
Ayon kay P/Chief Insp. Henry Navarro, hepe ng MPD-GAIS dakong alas-7 ng gabi nang maaresto ang mga suspek sa may Ibarra St. Blumentritt, Sampaloc, Maynila matapos ang ibinigay na impormasyon ng isang testigo.
Lumilitaw sa rekord na Enero 13 nang kaibiganin ng mga suspek ang biktimang si Li Wei Yang, 35, na Chinese national at nanunuluyan sa Makati Avenue, Makati City habang namamasyal sa may Intramuros at yayain na makipag-inuman sa kanila.
Huli na nang malaman ng biktima na ang alak na ibinigay sa kanya ng mga suspek ay may Ativan tablet na ikinahilo ng una. Nagawa ng mga suspek na makuha ang ATM card ng biktima at nagkaroon ng mga hindi awtorisadong withdrawal na umabot sa mahigit P100,000.
Nabatid pa sa pulisya na ang mga suspek ay dati nang nasangkot sa serye ng pag-ativan sa ilang mga dayuhan at may mga kaso na ring naisampa laban sa mga ito sa hukuman.
- Latest