Tren ng MRT-3, nagkaaberya: 900 pasahero, pinababa

MANILA, Philippines — Nagkaaberya ang isang tren ng Metro Rail Transit Line 3 (MRT-3) na nagresulta sa pagpapababa ng may 900 pasahero nito sa area ng Quezon City, kama­kalawa ng gabi.

Batay sa abiso ng MRT-3, dakong alas-5:56 ng gabi nang maganap ang unloading incident sa Cubao Station matapos na dumanas ng electrical failure ang motor ng isang southbound train nito.

Matapos naman ang may siyam na minuto ay nakasakay rin kaagad sa kasunod na tren ang mga pinababang pasahero.

Humingi naman ng paumanhin ang pamunuan ng MRT-3 sa kanilang mga pasahero at tiniyak na kaagad na isasailalim sa preventive maintenance at replacement ang mga electrical components ng nasirang tren.