Makati fire: 300 bahay naabo, 600 pamilya apektado
MANILA, Philippines — Tinatayang nasa 600 pamilya ang nawalan ng tirahan matapos masunog ang nasa 300 kabahayan, habang tatlo ang nasugatan kahapon ng madaling araw sa Makati City.
Sa report na natanggap ng hepe ng Makati City Police na si Senior Superintendent Rogelio Simon, nagsimula ang sunog ala-1:08 kahapon ng madaling araw mula sa ikatlong palapag ng Tucio Apartment, na nasa Laperal Compound, Brgy. Guadalupe Viejo ng naturang lungsod.
Mabilis na kumalat ang apoy dahil sa dikit-dikit ang mga kabahayan sa lugar kung saan karamihan ay gawa sa light materials.
Sabi ni District 3 fire marshall Supt. Jerry Berte, mga alas-4:20 ng umaga nang ideklara nilang fire-out ang insidente.
Umabot sa ‘Task Force Bravo’ ang alarma ng sunog.
Sa ngayon ay iniimbestigahan pa ng arson investigator ng Makati City BFP ang sanhi ng sunog at kung magkanong halaga ng mga ari-arian ang napinsala.
- Latest