Pasay Intel chief dedo sa shootout
Aarestuhing suspek todas din
MANILA, Philippines — Isang opisyal ng Pasay City Police ang nasawi nang mabaril ng inaarestong suspek sa pagpatay sa isang Grab driver noong nakaraang taon habang napatay naman ang suspek ng mga pulis makaraang mauwi sa shootout ang isinagawang operasyon sa naturang lungsod, kahapon.
Kinilala ni Pasay City Police chief, Sr. Supt. Noel Flores ang nasawi na si Sr. Insp. Manuel Taytayon, hepe ng Intelligence Division ng istas- yon matapos magtamo ng tama ng bala ng baril sa dibdib.
Napaslang din naman ng mga pulis ang suspek na si Marc Delemios, wanted sa pamamaslang sa isang Grab driver noong Oktubre 2017.
Sa inisyal na ulat, alas-2:30 ng hapon nang mag-sagawa ng operasyon ang Intelligence Division sa pangunguna ni Taytayon nang mabatid na nagtatago ang suspek na si Delemios sa may Don Carlos Revilla St., Sto. Niño, Brgy. 148 sa naturang lungsod.
Agad umanong naalarma si Delemios sa pagdating ng mga pulis kaya nagawa niyang makapagpaputok ng baril habang nasa ikaapat na palapag ng isang bahay at mapuruhan si Taytayon.
Gumanti ng putok ang mga kasamahan ng opisyal na nagresulta rin sa pagkakapaslang sa suspek.
Nabatid na naging viral sa social media si Delemios nang mapatay niya ang Grab driver na si Gerardo Maquidato. Naaresto at nakulong ang suspek ngunit nagawang makatakas.
Patuloy ang imbestigasyon ng pulisya sa naganap na barilan upang mabatid ang eksaktong naganap sa operasyon.
- Latest