Retired police, timbog sa gun running
MANILA, Philippines — Bultu-bultong mga bala, pampasabog at mga baril ang nakumpiska sa posesyon ng isang retiradong pulis sa ginanap na pagsalakay ng pulisya sa kanyang kuta sa Caloocan City, kamakalawa ng madaling araw.
Kinilala ang inaresto na si dating PO3 German Riogelon, alyas Jun Muslim, at Boy Muslim, 56, at nakatira sa Araneta Avenue, Pangarap Village, Brgy. 181 ng naturang lungsod.
Sa ulat ng pulisya, alas-5:12 ng madaling araw nang salakayin ng mga tauhan ng Regional Special Operations Units ng NCRPO ang bahay ng suspek at inihain ang search warrant na inilabas ni Judge Raymudo Vallega, ng Caloocan City Regional Trial Court Branch 130.
Tinangkang harangin ng misis ng suspek na si Analiza Acta ang mga pulis at magsinungaling na wala sa loob ng bahay ang suspek. Dito puwersahang pumasok ang mga pulis at nadiskubreng nagtatago lang sa loob ng bahay si Riogelon.
Dito tumambad at nakumpiska ng mga pulis ang isang M16 rifle, dalawang kalibre .45 pistols, isang cal. .38 revolver, isang granada at sari-saring bala para sa mga pistola at high powered rifles.
- Latest