6 illegal miners, timbog sa BI
MANILA, Philippines — Inaresto ng Bureau of Immigration ang anim na foreign nationals dahil sa pagkakasangkot sa illegal mining operations at pagtatrabaho sa bansa na walang kaukulang permit.
Sa ulat ni Immigration Commissioner Jaime Morente ni BI Intelligence Chief Fortunato Manahan Jr. naaresto ang mga banyaga sa kanilang opisina sa Xiaobo Scrap Trading Co. sa Luasan St., Bgy. Loma de Gato, Marilao, Bulacan.
Kinilala ang mga naaresto na sina Cheng Yi Huang, Taiwanese, at Chinese nationals na sina Junbo Deng, Yunli Zhou, Jun Li, Wei Lin, at Weike Qu.
Ayon kay Manahan, maliban kay Cheng na may valid resident visa, ang limang iba pang Chinese ay natuklasang overstaying at undocumented na sa bansa at bigong makapagrisinta ng kanilang pasaporte at iba pang travel documents.
Ilang mga residente sa Marilao umano ang nagreklamo sa mga dayuhan hinggil sa kanilang illegal na pagmimina doon bukod pa sa reklamong pagkakasangkot sa illegal export business.
Nilinaw din nito na ang mga dayuhan na nais magtrabaho sa Pilipinas ay kailangang kumuha ng work permit sa Department of Labor and Employment (DOLE) at working visa mula sa BI.
- Latest