4 miyembro ng KFR, nalambat sa NAIA
Dinukot na Chinese, nailigtas
MANILA, Philippines — Natimbog ng mga otoridad ang apat na sinasabing miyembro ng isang kilabot na kidnap-for-ransom group kabilang ang isang mag-asawa at dalawang Chinese national habang nailigtas naman ang kanilang dinukot na isa ring Chinese sa Terminal 3 ng Ninoy Aquino International Airport (NAIA) sa Pasay City, noong Biyernes ng gabi.
Detinado na ngayon sa PNP-AKG sa Camp Crame sa Quezon City ang mag-asawang suspek na sina Jayson at Liezl Inojardo, at dalawang Chinese na kasapakat ng mga ito na sina Lou Jianzhong at Lou Zhi Giang.
Isinugod naman sa ospital ang biktimang si Zhirong Lin dahil na rin sa masamang kalagayan nito matapos na dukutin ng mga suspek at takutin ang kanyang pamilya na may mangyayaring masama kapag hindi nagbigay ng ‘ransom money’ kapalit ng buhay.
Napag-alaman, nakatanggap ng intelligence report ang mga otoridad na magkakaroon ng transaksiyon ang grupo ng KFR kasama ang kanilang biktima at magkikita sila sa isang parking lot ng NAIA terminal 3.
Dahil dito ay agad na ikinasa ng PNP-AKG sa pakikipagtulungan ng airport policemen ang rescue operation sa paligid ng NAIA terminals habang nagsasagawa ng check-point ay namataan ang isang silver Toyota Innova na may plate number ARA-3842 at tangkang umiwas sa random inspection.
Nang harangin at pababain ng mga otoridad ang mga nakasakay dito nakita nila ang mga suspek batay na rin sa description ng dalawang anak ng biktima na kasama sa rescue operation.
Sa kabila nito ay patuloy pa ring nagsasagawa ng follow-up operation ang mga otoridad sa lalawigan ng Laguna dahil nandoon umano ang ilang kasamahan ng mga suspek na kabilang sa sindikato.
- Latest