Sunog sa Pasay: 1 patay

MANILA, Philippines — Isang lalaki ang nalitson nang buhay sa halos dalawang oras na naganap na sunog, kamakalawa ng gabi sa Pasay City.

Ayon sa report ng Bureau of Fire Protection (BFP) ng Pasay City, alas-10:00 ng gabi nang magsimula ang sunog sa isang pinto ng apartment na inuupahan ng isang nakilalang si Roniel Calamba,  sa kahabaan ng FB Harisson St. ng naturang siyudad.

Gayunman hindi pa makumpirma ng mga arson investigator ng BFP kung si Calamba nga ang natagpuang patay sa kabila ng inilabas na ulat ng Scene of the Crime Operation ng Southern Police Distirct (SPD) na ito ang nasawi.

Natagpuan ang labi ng biktima sa sala ng kanyang bahay na kung saan sunog na sunog ang buo nitong katawan.

Napag-alaman, na tuma­gal ng  halos dalawang oras ang sunog na umabot sa ikatlong alarma bago idineklarang fireout bandang alas-11:13 ng gabi.

Hanggang sa ngayon ay patuloy pa ring nagsasagawa ng masusing imbestigasyon ang mga awtoridad sa insidente kung saan inaalam kung ano ang pinagsimulan nito.