Abandonadong kontrabando sa MICP, ipinamahagi ng BOC sa mga biktima ni ‘Ompong’

MANILA, Philippines — Ipinamahagi na lamang ng Bureau of Customs sa mga naging biktima ng bagyong Ompong ang mga inabandonang kargamento at mga nasabat na produkto ng ahensiya na resulta ng anti smuggling campaign.

Kaugnay nito, inutos ni Customs Commissioner Isidro Lapeña ang pagpapalabas ng 7,000 sako ng bigas mula sa Port of Cebu upang maging donasyon sa libu-libong pamilyang sinalanta ni Ompong.

Bukod sa saku-sakong bigas, ipamamahagi na rin ng BOC ang  109 na package na naglalaman ng mga kumot,  153 na package ng mask, 350 na kahon ng bedsheets, kumot at tuwalya at 1,332 kahon ng mga damit.

Ayon pa kay Lapeña, mayroon ding 6,921 na bags  ng malagkit o glutinous rice  mula sa Port of Zamboanga ang  ipamimigay ng ahensiya sa mga sinalanta ng bagyong Ompong.

Tiniyak ni Lapeña na marami pang produktong nakum-piska sa anti-smuggling campaign ng Bureau of Customs ang ipamimigay sa panahon ng kalamidad at pangangailangan.