2 empleyado ng MMDA timbog sa droga, kotong
MANILA, Philippines — Timbog ang dalawang empleyado ng Metropolitan Manila Development Authority (MMDA) matapos maaktuhan ang isa dito na gumagamit ng droga sa comfort room ng naturang ahensiya at ang isa naman ay nangongotong sa isang aplikante na iniulat kahapon.
Kinilala ni MMDA General Manager Jojo Garcia ang mga nadakip na sina Rommel Aluyen, na nahuling gumagamit ng droga at Luisa Bon, na nangongotong naman. Ang dalawa ay kapwa nakatalaga sa administrative department.
Base sa record, si Aluyen ay nagsimulang magtrabaho sa ahensya noong 2003, samantalang si Bon ay noong 1996.
Sabi ni Garcia, nakatanggap siya ng report hinggil sa illegal drugs activities ni Aluyen, dahilan upang atasan niya ang kanyang mga tauhan na magkasa ng operasyon laban dito.
Nitong Miyerkules ay nadakip nga si Aluyen na gumagamit ng droga sa isa sa loob ng mga comfort room ng MMDA.
Napag-alaman na si Alu-yen ay isa sa empleyado na nagpositibo sa droga sa ikinasang sorpresang drug test ng pamunuan ng ahensya kung saan kasama ang 13 pang nagpositibo rin.
Samantala, si Bon naman ay nadakip matapos itong ireklamo ng isa sa mga aplikante na hiningian niya ng halagang P1,500.00 para makapagtrabaho sa naturang ahensiya.
Sa ngayon ay kapwa iniimbestigahan sina Aluyen at Bon ng pamunuan ng MMDA at sasampahan ang mga ito ng mga kaukulang kaso.
- Latest
