Kilalang aktor, nakabundol ng motor
MANILA, Philippines — Nasangkot sa isang aksidente sa daan ang model-actor na si Daniel Matsunaga makaraang masalpok niya ang isang rider sa Commonwealth Ave., Quezon City, kahapon ng umaga.
Batay sa report ng Quezon City Police District (QCPD) Traffic Sector 5, dakong alas-6:00 nang maganap ang aksidente sa kahabaan ng Commonwealth Ave., Don Antonio Drive, Brgy. Old Balara, ng lungsod.
Ayon sa report, minamaneho ni Matsunaga ang kanyang kotse galing sa isang restaurant kasama ang kanyang kapatid na si Gilherme, nang sa westbound lane ng nasabing kalsada ay kumanan ang actor patu-ngong Don Antonio St., pero biglang sumulpot ang motorsiklo na siyang dahilan para tamaan ang likurang bahagi ng motor at sumemplang ang driver.
Ayon kay MMDA traffic enforcer Joven Acosta, hindi napansin ni Matsunaga na may nabundol siya kaya tuloy-tuloy ang kanyang takbo.
Hinabol ni Acosta ang aktor at nang abutan ay napansin na malakas ang music sa loob ng sasakyan nito.
Dumaing ng pananakit ng baywang ang rider na humi-ling na huwag nang ihayag ang kanyang pangalan kaya isinugod sa pagamutan.
Matapos malapatan ng paunang lunas ang rider ay hindi na ito nagreklamo laban sa aktor sa halip ay pumirma na lamang sa isang ‘compromise agreement’ ang magkabilang panig.
- Latest