Toneladang basura nahakot sa Marikina City
MANILA, Philippines — Tone-toneladang basura na iniwan ng matinding pananalasa ng bagyong Karding at habagat ang nahakot ng mga operatiba ng Eastern Police District sa isinagawang clean-up drive sa lungsod kahapon.
Sa report ni Eastern Police District (EPD) Director P/Sr. Supt. Bernabe Balba ang clean-up drive ay bahagi ng pagtulong ng kapulisan sa paglilinis ng kapaligiran.
Una nang pinangasiwaan ng Marikina City Police ang rescue operation sa libong mga residente na naapektuhan ng pagbaha sa lungsod dulot ng malalakas na pagbuhos ng ulan.
Sinabi ni PO3 Catherine Capinpin ng Public Information Office (PIO) ng EPD, maaga pa lamang ay sinimulan na ang clean up drive sa kahabaan ng C5 Road, Brgy. IVC, Marikina City sa pamumuno ni Sr. Inspector Noel Rufon.
Binigyang diin ni Balba na hindi lamang sa drug war dapat maasahan ang kapulisan kundi sa disaster response lalo na sa panahon ng kalamidad at idinagdag pa rito ang pagtulong na malinis sa sangkaterbang basura ang mga naapektuhang lugar sa kaniyang nasasakupan.
Sa tala ang Marikina City ang isa sa grabeng naapektuhan ng Karding at habagat sa Metro Manila bunga ng pagragasa ng baha sa lungsod.
- Latest