Marikina isinailalim sa state of calamity

Higit 5-K residente, inilikas

MANILA, Philippines — Dahil sa walang tigil na pagbuhos ng ulan at patuloy na pagtaas ng tubig baha dulot ng bagyong ‘Josie’, ay nagdeklara na si Marikina City Mayor Marcelino Teo­doro ng state of calamity sa kanilang lungsod.

Sinabi ni Teodoro, layu­nin ng pagdedeklara niya ng state of calamity, na mas mapabilis ang rehabilitation at relief efforts ng lungsod.

Nagpapatupad na rin ani­ya sila ng price monitoring sa lahat ng pamilihan upang matiyak na walang negos-yante na mananaman­tala sa presyo ng mga panguna-hing bilihin.

Tiniyak din ng alkalde na alinsunod sa kasunduan nila ng Department of Social Welfare and Development (DSWD), ay matagal nang may mga suplay ng gamot at pagkain para sa mga evacuees, na nagagamit na aniya nila sa pagtulong sa mga nagsilikas na residente.

Nabatid na hanggang alas-2:00 ng hapon nitong Linggo ay umaabot na sa 1,207 pamilya o 5,071 indibidwal ang napilitang lumikas ng kanilang tahanan matapos na itaas sa ikalawang alarma ang alerto ng Marikina River.

Kasabay nito, nagdeklara na rin si Teodoro na walang pasok sa eskuwela ngayong araw sa lahat ng antas sa mga pampubliko at pribadong paaralan, sa kanilang lungsod dahil ang kanilang mga paaralan ay ginagamit bilang evacuation area ng mga lumikas na residente.