P.6-M cash nasamsam sa selda ng MM District Jail
MANILA, Philippines — Tinatatayang mahigit sa P.6 million cash, mga cellphone at patalim ang nakumpiska mula sa mga presong nakakulong sa Metro Manila District, Jail Annex 4 na nasa compound ng Camp Bagong Diwa, Taguig City kahapon ng umaga.
Ayon kay National Capital Regional Police Office (NCRPO) director, Chief Supt. Guillermo Eleazar, alas-5:00 kahapon ng umaga nang simulan ang greyhound operation sa naturang kulungan nang pinagsanib na pwersa ng pulisya, Bureau of Jail Management and Penology (BJMP) at Philippine Drug Enforcement Agency (PDEA).
Kung saan isa-isang pinalabas ang mga preso na nabulabog sa sorpresang pagsalakay. Gamit ng mga awtoridad ang K-9 dog ng inspeksiyunin ang mga selda.
Kinapkapan rin ang bawat isa sa mga preso na ayon kay Eleazar ay nakatanggap sila ng impormasyon mula sa isang naarestong suspect, na mayroon aniyang illegal drug transaction sa nabanggit na kulungan.
Hinalughog ang mga gamit ng mga preso na nasa loob ng mga selda.
Nabatid, na sa cell number 7, may nakuhang P630,000.00 na cash mula sa isang inmate na may kasong murder.
Sa ibang selda, nakuha ang mga bank receipts na may transaksyon na libu-libo rin ang halaga at aalamin ang mga laman nito. Ilan pa sa nakumpiska ay mga cellphone, ilang improvised na patalim at dalawang telebisyon.
Base sa patakaran ng BJMP, na P2,000 lamang na halaga ang pinapayagang makapasok sa kulungan kada araw.
Nabatid na ang Annex 4 ay may 369 inmates na karamihan ay high risk, na ang ilan ay miyembro umano ng Abu Sayyaf, NPA at grupo ng sindikato.
- Latest