Chinese trader tinodas
MANILA, Philippines — Isang 43-anyos na negosyanteng Instik ang itinumba ng dalawang ‘di pa natutukoy na mga suspek matapos siyang pasukin sa loob ng kanyang e-cigarette o vape shop at pagbabarilin, kamakalawa ng hatinggabi sa Binondo, Maynila.
Sanhi ng dalawang tama ng punglo sa katawan, nalagutan ng hininga habang ginagamot sa Gat Andres Bonifacio Memorial Medical Center (GABMMC) ang biktimang si Edward Pascual, residente ng 320 Claro M. Recto Avenue, Tondo, Maynila.
Sa ulat ng Manila Police District-homicide section, dakong alas-11:50 ng hatinggabi nang pasukin ng isa sa dalawang suspek na pawang mga nakasuot ng helmet ang biktima sa kanyang shop sa naturang lugar at agad na pinagbabaril.
Nang maisagawa ang pamamaslang ay kaswal na lumabas sa shop ang gunman at sumakay sa motorsiklong naghihintay sa kanya sa labas.
Ayon sa anak ng biktima, dati umanong nasangkot sa iligal na droga ang kanyang ama pero na-dismiss din ang kaso nito matapos na hindi mapatunayan.
Patuloy naman na iniimbestigahan ng pulisya ang motibo ng pagpaslang sa biktima.
- Latest