2 holdaper, utas sa shootout

MANILA, Philippines — Patay ang dalawang holdaper na riding in tandem matapos na manlaban sa mga tauhan ng Manila Police District (MPD) sa Riverside, Plaza Mexico, Intramuros, Maynila, kahapon ng madaling araw.  Ayon kay P/Chief Insp. Joselito Ocampo, chief ng District Security Operations Unit (DSOU), naganap ang insidente dakong ala-1:40 ng madaling araw.  Inilarawan ng mag-asawang biktima ang mga suspek na nasa edad 25-35 na siyang humoldap sa kanila habang nag-aabang  ng taxi sa Ayala Boulevard sa panulukan ng Taft Avenue  dakong alas –11:40 ng hatinggabi. 

Nabatid na hinintuan umano ng mga suspek ang mag-asawa, tinutukan ng baril at saka nagdeklara ng holdap. Sa takot ay ibinigay na ng mag-asawa ang bag ng babae. 

Humingi ng tulong ang mga biktima sa Criminal Investigation and Detection Group (CIDG) na nagkataong rumoronda sa lugar. Kaagad naman nagtayo ng checkpoint at nang maispatan ang mga suspek, pinara ito pero sa halip na huminto ay bumunot ng baril at nagpaputok sa direksiyon ng mga pulis dahilan para gumanti ng putok ang mga awtoridad na nagresulta ng agarang kamatayan ng mga suspek.  Narekober naman sa mga suspek ang bag, cellphone at pera ng mga biktima.  Patuloy na inaalam ng pulisya ang pagkakilanlan ng dalawang suspek.