Koreano niratrat ng tandem
MANILA, Philippines — Isang Korean national ang nasugatan nang pagbabarilin ng riding-in-tandem habang naghihintay ng Grab taxi service sa harapan ng isang hotel sa Malate, Maynila, kahapon ng madaling araw.
Nasa maayos nang kondisyon sa Manila Doctors’ Hospital ang biktimang si Bae Jung Hyun, 48-anyos na pansamantalang nanunuluyan sa Hotel 2016 na matatagpuan sa M.H. del Pilar St., Malate bagaman tinamaan ng bala sa hita.
Patuloy pang iniimbestigahan ang motibo sa krimen at kung sino ang dalawang lalaking suspek na sakay ng itim na Suzuki motorcycle na kapwa armado ng kalibre 45 baril.
Sa ulat sa tanggapan ni Supt. Robert Domingo, hepe ng Manila Police District Station 9, dakong ala-1:28 ng madaling araw, biglang lumutang umano sa tapat ng biktima ang dalawang suspek at mabilis na pinaputukan ang biktima bago humarurot papatakas.
Hindi naman namukhaan ng saksing si Christian Laceda, 26, barangay tanod ng Barangay 701, Zone 77 na nakasasakop sa lugar, dahil sa mga suot na full-faced helmet ng mga suspek.
- Latest