21 construction projects sa Makati, ipinatigil ni Binay
MANILA, Philippines — Nasa 21 construction projects ang pinatigil kahapon ng pamahalaang lungsod ng Makati matapos lumabag ang mga ito sa Building Code.
Ipinag-utos ni Makati City Mayor Abby Binay sa Officer-In-Charge ng Office of the City Building Official (CBO) na si Elmer Acuesta, na mag-issue ng Notices with Stoppage Order para sa pagpapatigil ng 21 construction projects dahil sa paglabag ng mga ito sa probisyong nakasaad sa National Building Code of the Philippines o P.D. 1096.
Ang mga may violation na construction project ay matatagpuan sa Brgy. Cembo (6); East Rembo (3); West Rembo (2); Palanan (1); Kasilawan (1); Poblacion (1); Pinagkaisahan (1); San Isidro (1); San Lorenzo (1); Guadalupe Nuevo (1); Pitogo (1); Bangkal (1); at San Antonio (1).
Ayon kay Binay, ang pagpapatigil ng mga naturang proyekto ay nagsisilbing babala sa lahat na ang pagpapatayo o paggawa ng anumang istraktura, residential man o pang-komersyo ay kinakailangang alinsunod sa batas.
Dapat aniya ang pangunahing prayoridad ng may-ari ng bahay o building pati na ng contractor ay ang kaligtasan at kapakanan ng mga naninirahan o namamalagi dito, kabilang na ang mga miyembro ng pamilya, mga manggagawa, at mga kliyente o kostumer.
Sinabi pa ni Acuesta, nilabag ng mga kontraktor ang Section 301 at Section 1102 ng Building Code, pati na ang Rule XI para sa Protection of Pedestrians during Construction or Demolition, sa ilalim ng revised Implementing Rules and Regulations nito.
Sa administrative liability, ang offender ay maaaring patawan ng multang hindi hihigit sa P10,000.
Sa criminal liability naman, ang sinumang mapapatunayan sa korte na nagkasala ay papatawan ng hindi hihigit sa P20,000 o di kaya pagkakakulong ng hindi hahaba sa dalawang taon o parehong ipapataw ayon sa desisyon ng korte.
Kapag ang nagkasala ay isang corporation o kompanya, partnership o association, ang parusa ay ipapataw sa mga opisyal at kapag isang banyaga ang guilty party, kaagad itong ipapa-deport matapos bayaran ang multa at o ma-serve ang kanyang sentensya.
- Latest