3 paslit nasagip: Ina, 3 kaanak timbog
MANILA, Philippines — Tatlong magkakapatid na paslit na ginagamit ng kanilang ina at 3 pang kapamilya sa online pornography ang nasagip sa isinasagawang joint operation ng PNP Anti-Trafficking in Persons Division (ATIPD), Women’s and Children Protection Center (CDPC) at Malabon City Police, kamakalawa ng gabi sa naturang lungsod.
Ang magkakapatid na biktima ay pawang nasa edad 2; 4 at 6-anyos, habang nadakip naman ang kanilang ina na si Marynel Cruz, 26; kapatid nitong si Mary Jane, 24; mga magulang nilang sina Mary Levy, 47 at Nelson, 51.
Ayon sa hepe ng Malabon City Police na si Senior Supt. Harry Espela, alas-11:45 ng gabi nang salakayin nila ang #10 Sulucan St., Brgy. Hulong Duhat ng naturang siyudad sa pamumuno ni ATIPD head Sr. Supt. Villamor Tuliao sa tulong ng International Justice Mission.
Ayon kina WCPD investigators, nadiskubre aniya ng ATIPD ang iligal na gawain ng mga suspect dahil na rin sa impormasyon ng Norwegian police nang madakip nila ang isa sa mga kliyente ng mga ito sa bansang Norway.
Dahilan upang magsagawa ng surveillance ang mga pulis sa lugar at nang magpositibo ay dito na nila isinagawa ng pagsalakay sa pamilya Cruz.
Naaktuhan pa ng pulisya ang mga biktima na isinasalang sa online pornography ng mga suspect, na kanilang kaanak kapalit ang bayad na dolyares sa mga kliyente nitong dayuhan.
Nabatid, na inamin ni Marynel kay PO2 Belza, una siyang nag-offer ng sexual act sa pamamagitan ng internet at nang magsimulang humiling ang mga kliyente nilang dayuhan nais nila batang babae ang makita nila, kung kaya’t dito na aniya isinalang ang kanyang anak na babae sa online pornography.
Narekober ng mga pulis ang electronic dildo, laptop, router, flash disk, 3 smart phones, sim card, nighties at money remittance..
Ang nadakip na mga suspect ay sasampahan ng mga kasong paglabag sa Republic Act No. 9208, or the Anti-Trafficking in Persons Act of 2003; Republic Act No. 9775, or the Anti-Child Pornography Act of 2009; Republic Act No. 7610, or the Special Protection of Children Against Abuse, Exploitation and Discrimination Act, and grave scandal in relation to the Electronic Commerce Act.
- Latest