Karnaper dedo sa engkwentro
MANILA, Philippines — Todas ang isang hinihinalang karnaper makaraang makipagbarilan sa mga pulis na rumesponde nang tangayin nito at kasabwat ang motorsiklo ng isang babae, kahapon ng madaling araw sa Caloocan City.
Patuloy na kinikilala ng mga pulis ang napaslang na suspek na isa sa tumangay sa Suzuki Raider J sa biktimang si Tiffany Chantel McBride.
Sa inisyal na ulat, sakay ng kanyang motorsiklo si McBride dakong ala-1:20 ng madaling araw nang harangin ng dalawang lalaki na armado ng baril sa may Tala Cemetery sa Phase 7 sa Brgy. 176 Bagong Silang.
Puwersahang tinangay ng mga salarin ang motorsiklo ng biktima na agad namang nakapagsumbong sa Police Community Precinct 3 na nagkasa ng ‘dragnet operations’.
Nang mamataan ang mga salarin, nagkaroon ng maigsing habulan hanggang sa makorner ang isa sa kanila. Sa halip na sumuko, pinaputukan umano ng salarin si PO1 Allan Hermoso na nagawang makakubli. Gumanti ng putok ang mga pulis na nagresulta sa pagkakapaslang sa salarin.
Inalarma naman ngayon ang motorsiklo na tinangay ng isa sa salarin habang patuloy ang manhunt ng mga pulis.
- Latest
