Nanlaban na pusher, patay
MANILA, Philippines — Nasawi noon din ang isang sinasabing kilabot na tulak ng droga matapos itong manlaban at makipagbarilan sa mga umarestong alagad ng batas habang nakatakas naman ang kanyang kasamahan sa ikinasang anti-drug operations, Sabado ng gabi sa Parañaque City.
Tumimbuwang noon din ang suspek na kinilala lang ng pulisya sa alyas na “Boy Tattoo”, edad 28-30 anyos.
Sa ulat ng Parañaque City Police, alas-5:00 ng madaling araw nang ikasa ang buy-bust laban sa mga suspek sa likuran ng isang malaking shopping mall sa may Sucat, Brgy. San Dionisio.
Isang pulis ang nagpanggap na buyer na matagumpay na nakabili ng droga na nagkakahalaga ng P1,000 mula sa mga suspek.
Ngunit, nakatunog ang mga suspek na pulis ang kanilang katransaksyon kung kaya’t agad nila itong pinaputukan.
Naging maagap naman ang mga alagad ng batas na nakapaligid lamang sa naturang lugar na gumanti rin ng mga putok dahilan upang bumulagta si Boy Tattoo habang mabilis namang nakatakas ang kasamahan nito. Narekober sa napatay na suspek ang isang kalibre .38 baril, dalawang plastic sachet ng shabu at marked money.
- Latest