Kiefer sinuspinde ng FIBA

Bumagsak sa random drug test

MANILA, Philippines — Hindi muna makalalaro si Gilas Pilipinas standout Kiefer Ravena sa anumang FIBA competitions makaraang magpositibo sa random drug test na isinagawa ng FIBA noong Pebrero 25 matapos ang laban ng Pilipinas at Japan.

Ipinadala ng FIBA ang resulta sa Samahang Basketbol ng Pilipinas noong Mayo 22 kung saan hindi pwedeng maglaro si Ra­vena sa loob ng 18 buwan mula Pebrero 25, 2018 hanggang Agosto 24, 2019.

“SBP has received formal communication dated 22 May 2018 from FIBA stating that Philippine National Team Player Kiefer Isaac Ravena was tested on February 24, 2018 – Philippines vs. Japan game at Mall of Asia Arena, Pa­say City,” ayon sa statement ng SBP.

Pinatawan ng FIBA ng parusa si Ravena nang makita sa kanyang sample urine ang 4-methylhexan-2-amine (methylhexaneamine), 1,3-dimethylbutylamine (DMBA) at higenamine na mga ipinagbabawal base sa 2018 WADA List of Prohibited Substances and Methods.

“Sample A and Sample B from the SAME urine sample taken from Mr. Ravena tested positive for three (3) ingredients in the WADA List of Prohibited Substances,” ayon pa sa statement ng SBP.

Humingi naman ng paumanhin si Ravena kahapon kung saan nilinaw nitong hindi niya alam na may ipinagbabawal na ingredients ang pre-workout drink na kanyang iniinom.

“I take full responsibility my actions despite how painful and dreadful it is. I took this drink without analyzing what is ingredients are. I am a responsible man. I will face the consequences no matter how painful and life changing they may be,” ani Ravena.

Lilinawin pa ng SBP sa FIBA kung apektado rin ang paglalaro ni Ravena sa NLEX sa PBA.

Naglaro si Ravena nang talunin ng Gilas Pilipinas ang Japan, 89-84 kung saan nagtala ito ng 13 puntos, limang assists, dalawang rebounds at da­lawang steals.