Sister city ng Quezon City at Davao, palalakasin pa ni Joy B

MANILA, Philippines — Patuloy na palalakasin ni Quezon City Vice Mayor Joy Belmonte ang sister city agreement ng  lungsod  at ng Davao City.

Ayon kay Belmonte, na tumatayong presiding officer ng Sangguniang Panglungsod, naghain ng draft resolution si 3rd District Councilor Gian Carlo Sotto na naglalayong itaguyod muli ang sister city agreement ng dalawang lungsod.

“I believe the re-establishment of our sister city partnership with Davao City will boost our socio-cultural, trade and economic development,” pahayag ni Belmonte makaraang bisitahin ang Davao City na bayan ni Pangulong Rodrigo Duterte.

Anya,  maraming matututunan ang QC  sa Davao City sa larangan ng pamamahala, disaster management, transportasyon, turismo, edukasyon, teknolohiya, at iba pa.

Mayroon nang sister city agreement ang QC  at Davao City na nilagdaan noong Oktubre 12, 1994 ng noo’y Quezon City Mayor Ismael Mathay at noo’y Davao City Mayor Rodrigo Duterte ngunit hindi ito napagtibay ng Sangguniang Panglungsod noon.

“Mayor Sara Duterte will be in Quezon City next month to sign the new agreement with Mayor HB (Herbert Bautista),” anunsyo ni Belmonte.

Ayon sa draft resolution ni Sotto, ang bagong kasunduang ito ay lalo pang magpapatibay ng ugnayan ng QC at  Davao City.

Mula noong 1967, may 21 sister cities na ang lungsod, kabilang na ang 12 lungsod sa iba’t ibang bansa tulad ng Myanmar, China, US, Taiwan, Canada, at Japan.