Lola pisak sa bumagsak na crane
MANILA, Philippines — Patay ang isang 74-anyos na lola makaraang mabagsakan ng naputol na crane habang nagwawalis malapit sa isang construction site sa Brgy. Old Balara, Quezon City kahapon ng umaga.
Kinilala ang biktima na si Rosalinda Mendez na nagtamo ng matinding sugat sa katawan partikular na sa kaniyang ulo at idineklarang dead on arrival sa pagamutan.
Sa ulat ng tanggapan ni Quezon City Police District P/Chief Supt. Joselito Esquivel, bandang alas-5:20 ng umaga nang mangyari ang insidente sa nasabing lugar.
Ayon sa inisyal na imbestigasyon, kasalukuyang nagwawalis ang matanda nang aksidente itong mabagsakan ng ibabaw na bahagi ng crane na tumama sa matanda.
Agad namang sumaklolo ang mga residente sa lugar at isinugod sa pagamutan ang matanda pero nabigo ng maisalba ang buhay nito matapos na magtamo ng matinding sugat sa katawan partikular na sa kaniyang ulo.
Sa pahayag ng testigong si Ayen Infante sa mga awtoridad ang nasabing crane ay gamit ng contractor na NovaBala Corporation sa mga proyekto ng Manila Water.
Sa pahayag naman ni Manila Water Corporate Communications Chief Jeric Sevilla, ang nasabing crane ay gamit sa project upang madagdagan ang idini-deliver na tubig galing sa La Mesa Dam patungo sa kanilang planta sa Old Balara sa lungsod.
“There is a hole in the ground that pulls a casing mechanism, which resulted in the collapse of the crane. This is the initial information that we have for now,” pahayag ni Sevilla.
Inihayag pa ng opisyal na pansamantala nilang ipatitigil ang proyekto upang alamin kung nagkaroon ng pagkukulang sa pagtiyak sa seguridad ng sinuman sa lugar.
- Latest