‘Rolling Tienda’ ni Joy B, umarangkada ulit sa QC
MANILA, Philippines — Sa kagustuhang maipaabot sa masa ang murang bigas, umarangkada ulit kahapon ang ‘Rolling Tienda/Bigas para sa Masa’ ni Quezon City Vice Mayor Joy Belmonte kasama ang Department of Agriculture sa Brgy. Sto Niño at Tatalon sa Quezon City.
Ito ay ayon kay Belmonte ay bahagi ng kampanya ng tanggapan na maihatid sa mga taga-QC ang quality commercial rice na nagmula sa CALABARZON na may mababang halaga lamang sa kabila ng kakulangan ng NFA rice sa merkado na laan sa mahihirap na mamamayan.
“Ito po ay isang hakbang natin para matulungan na makabili ng murang bigas ang ating mga kababayan, ito po ay commercial rice at hindi NFA rice, pero ito pong commercial rice na ito ay mabibili lamang sa halagang P38 kada kilo. Ang rolling tienda ay mag-iikot sa iba pang barangay hanggang April 30 para maabot din po ng iba pa nating mga kababayan ang murang bigas,” pahayag ni Belmonte.
Anya, mas affordable na bilhin ang bigas na ito dahil ang commercial rice ngayon ay may halagang P44 hanggang P55 kada kilo.
Sinabi ni Belmonte na kada pamilya ay may alokasyong makabili ng hanggang 10 kilo ng murang commercial bigas.
May mahigit na sa 3 tonelada ng commercial rice ang na-dispose ng Rolling Tienda sa ginawang pag-iikot sa QC mula noong Lunes hanggang kahapon kasama ang DA.Unang nai-lunsad ang ‘Rolling Tienda/ Bigas para sa Masa’ sa Brgy. Payatas kasama ang DA na sagot sa panawagan ni Pangulong Rodrigo Duterte na paglaanan ng murang pagkain ang mamamayan.
- Latest