Recall sa San Juan walang pondo: Beripikasyon ng lagda naudlot

MANILA, Philippines — Naudlot ang beripikasyon ng mga boto ng mga residente na humihiling na magkaroon ng recall election sa lungsod ng San Juan.

Sinabi ni Atty. Gregorio Bonifacio, election officer IV ng San Juan, wala pa silang natatanggap na pondo mula sa Commission on Elections (Comelec) para sa naturang akti­bidad kaya’t hindi natuloy ang beripikasyon na nakatakda sanang simulan dakong alas-8:00 ng umaga kahapon, Abril 25 at magtatagal hanggang Mayo 1.

Tiniyak naman ni Bonifacio na sa san­daling matanggap na nila ang pondo ay kaagad nilang itutuloy ang proseso ng beripikasyon ng mga lagda.

Ikinadismaya naman ni dating Vice Ma­yor Francis Zamora ang pagkaantala  lalo na at hindi sila kaagad naimpormahan hinggil dito.

Ayon kay Zamora, kamakalawa ay na­ka­­tanggap pa sila ng bagong notice na nagsasaad na nagpalit ng venue para sa verification, na gagawin mula  sa San Juan gym ay inilipat sa Pinaglabanan Ele­mentary School.

Gayunman, pagdating umano niya at ng kanyang mga tagasuporta sa venue dakong alas-8:00 ng umaga kahapon, ay nagulat na lang sila nang ipaalam sa kanila ni Bonifacio na hindi matutuloy ang beripikasyon dahil hindi ini-release ng Comelec ang budget para dito.

“This is very questionable and unfair especially because it was the Comelec itself that denied the MR and set the dates of verification. Why will they say now that there is no budget when in fact they themselves approved of the verification?” ani Zamora.

“Also, upon checking, there is 98 million pesos in the 2018 general appropriations act for the Comelec intended for recall and re-ferenda for the National Capital Region. This proves that there is indeed a budget,” aniya pa.

Iginiit ni Zamora na wala namang iba pang lungsod sa Metro Manila na magkakaroon ng recall kaya’t tiyak aniyang intact o buo pa ang naturang pondo para dito.

Sa panig naman ni Mayor Guia Gomez, iginiit nito na peke ang karamihan sa mga pirmang nakalap ng mga tagasuporta ni Zamora para sa recall petition. 

Ayon kay Gomez, marami sa mga sinasabing signatories ay hindi alam na recall petition ang kanilang pinipirmahan at inakalang medical at educational assistance forms ang kanilang nilalagdaan.