P5 -million shabu nasamsam sa drug raid sa Muntinlupa
Target na Chinese nakapuslit
MANILA, Philippines — Umaabot sa isang kilo ng shabu na nagkakahalaga ng P5-M ang nakumpiska ng pinagsanib na elemento ng PNP-Drug Enforcement Group, Philippine Drug Enforcement Agency (PDEA) at Muntinlupa City Police sa isinagawang raid sa condominium unit ng isang Chinese drug trafficker sa nabanggit na lungsod kahapon ng umaga.
Sa press briefing sa Camp Crame, iprinisinta nina PNP Chief P/Director General Oscar Albayalde, PNP-DEG Director P/Chief Supt. Albert Ignatius Ferro at iba pang mga opisyal ang nakumpiskang droga.
Bandang alas-5:40 ng umaga nang salakayin ng mga awtoridad, ang condominium unit na pag-aari ng suspect na si Li Hong Peng sa Room 323 Rhapsody Condominium, Buli, Muntinlupa City pero nabigong masakote ang target.
Inamin ni Ferro na si Peng ay minsan ng nasakote sa pag-iingat ng 20 kilo ng shabu pero nakalaya matapos umanong magpiyansa.
Alinsunod sa isinasaad sa Comprehensive Dange-rous Drugs Act 2002 ang pagtataglay ng 10 gramo ng shabu ay isang non-bailable offence pero sa kabila ng nasakote na si Peng sa 20 kilo ng shabu ay dismayado ang mga awtoridad dahilan pinalaya ito ng korte matapos na maglagak ng mala-king halaga ng piyansa.
Nabatid na si Peng ay isa sa mga lider ng drug syndicate ay nasakote na noong Enero 2012 sa San Juan City matapos na ito at ang kanyang misis na si Aina Laquire ay mahulihan ng droga sa raid sa San Juan City.
Samantalang nitong nakaraang taon ay muling nasakote si Peng sa raid sa Parañaque City pero nakalaya muli nang magpiyansa.
“The President is already looking into this. In a few days time, we will be informed. Actually, we are trying to conduct further investigation to account the judge who allowed bail for such a non-bailable offense,” dismayadong pag-amin pa ni Ferro.
Kaugnay nito, sinabi naman ni Albayalde na inatasan na niya ang kaniyang mga tauhan upang paigtingin ang kaso laban sa mga drug suspects at upang hindi makitaan ng butas ng mga abogado ang asunto pabor sa kanilang mga kliyente.
“We have to make our cases airtight. In any cases in a buy-bust operation, it is true that there are some technicalities that can be used. So it’s really very important that when we file a case it should be airtight,” ang sabi pa ng Chief PNP.
- Latest