Bangkay ng matanda nilalapa ng mga daga nang matagpuan
MANILA, Philippines — Nilalapa ng mga daga nang matagpuan ang bangkay ng isang matanda na may tama ng saksak sa iba’t ibang bahagi ng katawan sa gilid ng isang gasolinahan sa Quezon City kahapon ng madaling araw.
Kinilala ni P/Supt. Rodelio B. Marcelo, hepe ng Criminal Investigation and Detection Unit (CIDU) ng Quezon City Police District (QCPD), ang biktima na si Eliseo Tuazon Samia, 69-anyos, taxi driver at naninirahan sa No. 32A Gen. Malvar St., TS Cruz compound, Brgy. San Agustin, Novaliches, Quezon City.
Sa imbestigasyon ni PO3 Virgilio N. Mendoza, ng CIDU-QCPD, natagpuan ang bangkay ng matanda dakong alas-4:00 kahapon ng madaling araw sa madilim na bahagi ng Susano Road malapit sa Shell gasoline station.
Ang biktima ay tadtad ng saksak ng patalim sa iba’t ibang bahagi ng katawan at natagpuang pinagpipista- han na ng mga daga.
Sinasabing nagpapatrulya ang mga tauhan ng Novaliches police station nang maispatan ang bangkay ng biktima sa nasabing lugar.
Nagsasagawa ngayon ng masusing imbestigasyon ang pulisya para matukoy kung sino ang salarin at kung ano ang motibo ng krimen.
- Latest
