Top 10 most wanted sa NPD, timbog
MANILA, Philippines — Bumagsak sa kulungan ang itinuturing na top 10 most wanted ng Northern Police District (NPD) makaraang bumalik sa kanilang tahanan matapos ang ilang buwang pagtatago, kamakalawa ng hapon sa Caloocan City.
Kinilala ni NPD Director Amando Clifton Empiso ang nadakip na si Emmar Pesimo, alyas Mar, 36, binata, towing crew at naninirahan sa Langaray Street, Brgy. 14, ng naturang lungsod.
Nahaharap ang suspek sa kasong attempted rape sa sala ni Judge Ma. Antonia Largoza-Cantero ng Malabon City Regional Trial Court Branch 170.
Sa ulat, nakatanggap ng impormasyon ang NPD Special Operations Unit na naispatan si Pesimo sa kanyang bahay kaya agad na nagkasa ng operasyon ang mga awtoridad dakong alas-12:15 ng hapon na nagresulta sa pagkakadakip sa kanya.
Nakaditine sa NPD-SOU ang suspek habang ibinalik na sa korte ang warrant of arrest at naghihintay ng utos ng huwes kung saan ididitine si Pesimo.
Samantala, nadakip naman sa isang buy-bust operation dakong alas-12:30 kahapon ng madaling araw ang mag-live-in partner na sina Randy Amio at Iris Gili, kapwa 36, at nakatira sa Villarama Street, Brgy. 37, ng naturang lungsod.
Pitong plastic sachet na naglalaman ng hinihinalang shabu ang nakumpiska ng mga pulis sa dalawa na nagkakahalaga ng P80,000. Nabatid rin na kapwa sila nakatala sa drug watchlist ng pulisya at sa kanilang bara-ngay.
- Latest