‘Gun runner con-holdaper’, timbog sa Marikina
MANILA, Philippines — Isang umano’y miyembro ng ‘gun runner con holdaper’ ang naaresto ng mga awtoridad sa isinagawang buy bust operation sa Marikina City, kamakalawa ng gabi.
Batay sa ulat ng Marikina City Police, dakong alas-9:30 ng gabi kamakalawa nang maaresto ng kanilang Intelligence Operatives ang suspek na si Ramoncito Calilap, alyas Taks, 27, sa isinagawang pagsalakay sa kanyang tahanan sa Bagong Silang St. sa Brgy. Nangka.
Nauna rito, nakatanggap ng report ang pulisya hinggil sa ilegal na aktibidad ng suspek kaya’t kaagad na nagsagawa ng buy-bust operation, na nagresulta sa kanyang pagkakaaresto.
Ayon kay P/ Sr. Supt. Roger Quezada, chief ng Marikina City Police Station, si Calilap, na nakadetine na sa kanilang presinto ay sinasabing isang gun runner at sangkot sa serye ng robbery hold-up sa Marikina City at mga kalapit na siyudad.
Nabawi ng pulisya sa suspek ang isang Ingram sub machine gun na may dalawang magazines na loaded ng tig-10 live ammunition, limang live ammunition, isang Armscor 9mm pistol, isang magazine na loaded ng limang bala at isang pakete ng hinihinalang shabu. Si Calilap ay sasampahan ng mga kasong paglabag sa Republic Act 10591 o Illegal possession of firearms at RA 9165 o illegal possession of illegal drugs.
- Latest
