Lisensya, prangkisa nang sumama sa tigil pasada, ikakansela -- LTFRB
MANILA, Philippines — Ipakakansela ng Land Transportation Franchising and Regulatory Board (LTFRB) ang drivers license at kakanselahin ang prangkisa ng mga driver na nagsagawa ng transport strike kahapon.
Ito ang banta ni LTFRB Board member Aileen Lizada dahilan sa anya’y ito ang karaniwang penalty ng ahensiya sa mga nagsagawa ng tigil-pasada sa nagdaang mga buwan.
Sinabi ni Lizada na sa ngayon ay may nakansela na silang franchise dahil sa pagsama sa transport strike ng mga pampasaherong sasakyan.
Isa sa kinasuhan noon ng LTFRB si PISTON President George San Mateo nang pangunahan noong nagdaang taon ang dalawang araw na malakihang tigil -pasada sa Metro Manila kasabay ng transport protest ng mga kaalyadong grupo sa mga lalawigan.
Sa ngayon si San Mateo ay nakalalaya sa bisa ng nai-lagak na piyansa sa korte. Siya ay kinasuhan ng LTFRB ng paglabag sa Section 20 (k) ng Commonwealth Act No. 146 o Public Service Act.
Sa ginawang tigil pasada kahapon ng Piston, sinabi ni San Mateo na bahagi ng kanilang karapatan sa pamamahayag ang ginawa at hindi paglabag sa batas ang kanilang pagkilos hinggil sa pagtutol ng kanilang hanay sa jeepney phase out na ginagawa ng pamahalaan.
Anya, hindi phaseout kundi rehabilitasyon lamang ng mga lumang jeep ang kailangan upang walang maliliit na driver ang mawawalan ng hanapbuhay para sa kanilang pamilya.
Dahil sa tigil pasada, suspendido kahapon ang klase ng mga mag aaral sa QC, Makati, Maynila, Taguig at San Pablo City Laguna.
- Latest